De qué sèm ?
Sèm una organizacion politica federativa e democratica, dubèrta a totes los que desiran obrar pel desvolopament d'una consciéncia ciutadana occitana coma element d'una ciutadanetat planetària. Volèm respondre a las preocupacions de nòstra societat, que son socialas, economicas, ecologicas e culturalas. La question de las decisions, que sián politicas o economicas, de la manièra e dels endrets ont se prenon, es una question màger.
Qual sèm ?
Sèm d'occitans, de personas que vivon en Occitània, conscientas de lor especificitat. D'unes parlan la lenga e la transmeton. D'autres la parlan pas mas considèran qu'es un element important que cal desvolopar e qu'es de la responsabilitat de totes los que vivon sul territòri occitan, quala que siá lor origina. Volèm metre aqueles elements de l'identitat occitana al servici del desvolopament de nòstre territòri.
De qué parlam ?
Parlam de la centralizacion en França que trava lo desvolopament durable dins los domenis economic, social, cultural e lingüistic. Lo centralisme limita l'exercici de la democracia dins nòstres territòris. Per nosautres, l’Union europèa es un espaci pertinent per tal que s'organize un federalisme de las regions d'Euròpa. Lo federalisme es per nosautres lo biais de prendre compte las constrenchas ecologicas planetàrias ambe lors consequéncias economicas e socialas. Sèm favorables a çò que s'apèla « lo federalisme diferenciat ».
A qual parlam ?
Parlam primièr a tots los que demòran en Occitània. Parlam tanben a totes los qu'an pas renonciat a la politica coma un dels mejans de crear las condicions del cambiament e del progrès. Parlam als joves qu'an la responsabilitat de prendre en man un monde ont los problèmas son nombroses. Aquel monde globalizat nòstre present e serà lor futur. Tre ara devon prendre en compte las questions pausadas per un sègle de desvolopament qu'a permés d'avançadas mas que daissa tanben un fum de questions.